لاہور (ڈیلی پاکستان آن لائن ) بھارتی میڈیا نے دعویٰ کیاہے کہ پاکستان سے کشیدگی کے بعد بھارت نے ایشیاءکپ نہ کھیلنے کا حتمی فیصلہ کر لیاہے ۔

بھارتی میڈیا کے مطابق بھارتی کرکٹ بورڈ نے ایشیاء کپ اور ویمن ایمرجنگ ایشیاء کپ سے دستبردار ہونے کا فیصلہ کر لیاہے ، ایشیا ءکپ ستمبر میں بھارت اور ویمن ایمرجنگ ایشیاءکپ جون میں سری لنکا میں شیڈول ہے ۔

ایشیئن کرکٹ کونسل کے صدر چیئرمین پی سی بی محسن نقوی ہیں جس پر بی سی سی آئی اہلکار کا کہناتھا کہ بھارتی ٹیم ایسا ٹورنامنٹ نہیں کھیل سکتی جس کے سربراہ پاکستان کے وزیر ہیں، ویمن ایمرجنگ ایشیاء کپ سے دستبرداری کا ایشیئن کرکٹ کونسل کو زبانی بتا دیاہے ، ایشیئن کرکٹ کونسل کے باقی شیڈول ایونٹس کو بھی ہولڈ کر دیاہے ، ہم اس حوالے سے حکومت کے ساتھ مسلسل رابطے میں ہیں.

نجی ٹی وی نے ذرائع کے حوالے سے کہاہے کہ بی سی سی آئی نے ایشیئن کرکٹ کونسل کو اپنی دستبرداری سے آگاہ نہیں کیا ہے ، بھارت کی ایشیاء کپ سے دستبرداری کی تیاری سے متعلق اطلاعات ہیں۔

بھارتی میڈیا کا کہناہے کہ پاک، بھارت کشیدگی کے سبب بی سی سی آئی نے ٹورنامنٹ سے دستبرداری کا فیصلہ کیاہے ، اس سال ہونے والا ایشیا ءکپ بھارت میں شیڈول ہے ، بھارت ایشیا ءکپ کا دفاعی چیمپئن بھی ہے ۔