دبئی (ڈیلی پاکستان آن لائن )انٹرنیشنل کرکٹ کونسل نے بھارت کے دباؤ پر پاکستان میں چیمپینز ٹرافی کے ٹور سے آزاد کشمیر اور بلتستان کو نکال دیا ہے۔

نجی ٹی وی آج نیوز کے مطابق بھارتی کرکٹ بورڈ کے ایک عہدیدار نے بتایا کہ یکم دسمبر کو آئی سی سی کے چیئرمین کا منصب سنبھالنے والے جے شاہ نے آئی سی سی سے کہہ دیا تھا کہ پاکستان کا چیمپینز ٹرافی کے ٹور میں آزاد کشمیر اور بلتستان کو شامل کرنے کا فیصلہ یکسر ناقابلِ قبول ہے۔

انڈین ایکسپریس کی ایک رپورٹ کے مطابق معلوم ہوا ہے کہ پاکستان کرکٹ بورڈ نے چیمپینز ٹرافی کا ٹور کراچی، لاہور اور راولپنڈی تک محدود رکھنے پر رضامندی ظاہر کردی ہے۔بھارتی کرکٹ بورڈ نے آزاد کشمیر اور بلتستان کے حوالے سے آئی سی سی میں تحریری اعتراض داخل کیا تھا۔

جمعرات کو پاکستان کرکٹ بورڈ نے سوشل میڈیا پلیٹ فارم ایکس پر لکھا تھا خبردار پاکستان! 16 نومبر کو پاکستان میں چیمپینز ٹرافی کا ٹور اسلام آباد سے شروع ہو رہا ہے۔ پی سی بی نے بتایا تھا کہ ٹرافی اسکردو، مری، ہُنزہ اور مظفرآباد بھی لے جائی جائے گی۔

استفسار کے باوجود بھارتی کرکٹ بورڈ نے اب تک پاکستان کو نہیں بتایا ہے کہ وہ اپنی کرکٹ ٹیم کو پاکستان بھیجنے سے انکار کیوں کر رہا ہے۔