لاہور (ڈیلی پاکستان آن لائن) وزیر مملکت مذہبی امورکھیل داس کوہستانی کا کہنا ہے بانی پی ٹی آئی جس صورتحال سے گزر رہے ہیں اس کے وہ خود ذمہ دار ہیں اور اپنے جرائم کی پاداش میں جیل کاٹ رہے ہیں۔ وہ پہلے سیاسی لیڈر نہیں جو جیل میں ہیں، ماضی دیکھیں تو بڑے بڑے لیڈر جیل کی صعوبتیں کاٹ چکے ہیں، لیکن کسی بھی سیاسی لیڈر نے 9 مئی جیسا واقعہ نہیں کیا۔ شہادتیں ہوئیں، لاشیں اٹھائیں، مگر ایسا رویہ کسی سیاسی جماعت کا نہیں رہا۔ اس تمام فساد کی جڑ بانی پی ٹی آئی خود ہیں۔ بانی پی ٹی آئی اپنی ذات کے علاوہ کسی پر اعتماد نہیں کرتے، جبکہ ان کے رفقاء جیلوں سے کھلے خط لکھ رہے ہیں۔ انہوں نے کہا کہ علیمہ خان صاحبہ ہمیشہ جھوٹ بولتی ہیں، جیل کے باہر فساد پھیلاتی ہیں۔ بانی پی ٹی آئی کے بیٹے پاکستان آکر پاکستانی قوانین کی خلاف ورزی کرتے ہیں تو گرفتاری بھی ہو سکتی ہے۔

’’دنیا نیوز‘‘ کے پروگرام’’ آن دی فرنٹ ود کامران شاہد‘‘ میں گفتگو کرتے ہوئے کھیل داس کوہستانی نے مزید کہا احتجاجی تحریک کو جان بوجھ کر متنازع بنا دیا گیا ہے۔ بانی پی ٹی آئی کے بیٹے 2 سال پہلے کہاں تھے، 2 سال کے دوران انہوں نے مقدمہ کیوں نہیں لڑا۔ اب اچانک سے یہ خبر دینا تحریک کو متنازع بنانا ہے۔