کراچی (ڈیلی پاکستان آن لائن)کراچی کے علاقے اورنگی ٹاؤن قذافی چوک کے قریب ڈکیتی کے دوران مزاحمت کرنے پر سعودی عرب سے والد کے انتقال کے بعد تدفین کے لیے آیا ہوا نوجوان مسلح ڈاکوؤں کی فائرنگ سے جاں بحق ہوگیا۔

ڈان نیوز کے مطابق پولیس حکام کا کہنا ہے کہ اورنگی ٹاؤن میں ڈکیتی کے دوران مزاحمت کرنے پر فائرنگ سے جاں بحق ہونے والے شخص کی شناخت جبران کے نام سے ہوئی ہے، موٹرسائیکل سوار 2 ملزمان نے مقتول سے لوٹ مار کی اور مزاحمت کرنے پر گولیاں مار دیں۔

مقتول کے اہل خانہ کے مطابق وہ سعودی عرب میں ملازمت کرتا تھا اور چند روز قبل ہی اپنے والد کے انتقال کی خبر ملنے پر تدفین کے سلسلے میں کراچی آیا تھا۔

رواں سال جنوری کے مہینے میں ڈکیتی میں مزاحمت پر 5، فروری مارچ اور اپریل میں 20، 20 مئی میں 12، جون میں ایک اور جولائی میں اب تک 2 افراد لوٹ مار کے دوران جان سے ہاتھ دھو چکے ہیں، ڈکیتی کے دوران فائرنگ کے دیگر واقعات میں بھی مزید 10 شہری جان سے ہاتھ دھو بیٹھے، رواں سال 50 شہری ڈاکوؤں کی فائرنگ سے جاں بحق ہوچکے ہیں۔

دوسری جانب اورنگی ٹاؤن کے علاقے گلشن بہار میں مبینہ پولیس مقابلے میں ایک ڈاکو کو زخمی حالت میں گرفتار کرلیا گیا، جب کہ اس کا ساتھی فرار ہوگیا۔ گرفتار ملزم سے اسلحہ اور موٹرسائیکل برآمد ہوئی ہے۔