کراچی (ویب ڈیسک) عزیز آباد میں شادی ہال میں دلہا اور دلہن کے رشتے داروں میں تلخ کلامی اور ہاتھا پائی ہوگئی۔

نجی ٹی وی جیو نیوز کے مطابق عزیزآباد میں 2 روزقبل شادی ہال میں دلہا اور دلہن والوں کے رشتے دار آپس میں لڑپڑے،جھگڑے کے دوران دونوں پارٹیوں نے ایک دوسرے کی خوب درگت بنائی جب کہ اس دوران کرسیاں بھی چلیں۔

واقعہ کی سی سی ٹی وی بھی منظر عام پر آئی جس میں پہلے دلہا اور دلہن والوں کے رشتے داروں کے درمیان تلخ کلامی ہوئی اور پھر ہاتھا پائی شروع ہوگئی جب کہ ایک دوسرے پر کرسیاں بھی پھینکی گئیں

صورتحال پر قابو پانے کے لیے شادی ہال انتظامیہ نے پولیس کو بلایا تو مشتعل افراد نے پولیس سے بھی ہاتھا پائی کی جس کے نتیجے میں پولیس کانسٹیبل حافظ عثمان زخمی ہوگیا۔

پولیس نے جھگڑا کرنے کے الزام میں تین افراد یونس مسیح، ہیری اور ہیری ولد وکٹر کو گرفتار کرلیا گیا جب کہ 30 سے 40 نامعلوم افراد کے خلاف عزیزآباد تھانے میں مقدمہ درج کرلیا گیا جس میں ہنگامہ آرائی،تھوڑ پھوڑ اور پولیس اہلکاروں پر تشدد کی دفعات شامل کی گئی ہیں۔