لاہور(ڈیلی پاکستان آن لائن )وزیر اطلاعات پنجاب عظمیٰ بخاری نے کہا ہے کہ بانی پاکستان تحریک انصاف حسبِ روایت تیسری مرتبہ پولی گرافک ٹیسٹ سے انکار کر کے نہ صرف عدالتی احکامات کی خلاف ورزی کر رہے ہیں بلکہ اپنی سچائی سے خود ہی نظریں چرا رہے ہیں۔بانی پی ٹی آئی گزشتہ 3 دنوں سے پولی گرافک ٹیسٹ کرنے والی ٹیم سے دانستہ طور پر چھپ رہے ہیں۔کبھی اطلاع دی جاتی ہے کہ وہ سو رہے ہیں، کبھی یہ مؤقف اپنایا جاتا ہے کہ وہ کھانے میں مصروف ہیں، اور کبھی کہا جاتا ہے کہ ان کے وکلاء دستیاب نہیں۔

انہوں نے کہا کہ انہیں آج بھی اس حقیقت کا یقین نہیں آ رہا کہ وہ سزا یافتہ مجرم ہیں اور اس وقت جیل کی سزا کاٹ رہے ہیں۔ انہیں سمجھنا ہوگا کہ یہ بنی گالہ نہیں، اڈیالہ جیل ہے۔انہوں نے مزید کہا کہ لاہور پولیس عدالتی حکم پر بانی پی ٹی آئی کے پولی گرافک اور فوٹوگرامنگ ٹیسٹ کے لیے جیل پہنچی، لیکن بانی پی ٹی آئی نے ہر مرتبہ کسی نہ کسی بہانے سے ٹیسٹ سے بچنے کی کوشش کی۔ان کی بہنیں اور پارٹی قیادت روزانہ عدالتی فیصلوں کی دہائی دیتی ہیں، لیکن بانی پی ٹی آئی خود ان فیصلوں پر عملدرآمد سے گریزاں ہیں۔

وزیر اطلاعات نے 9 مئی کے واقعات پر بات کرتے ہوئے اسے ریاست کے خلاف ایک کھلی بغاوت قرار دیا اور کہا کہ اس دن کے ماسٹر مائنڈ اور سہولت کاروں کو اپنے اعمال کے نتائج بھگتنا ہوں گے۔آج لاہور پولیس عدالتی احکامات پر عمل کرتے ہوئے کام کر رہی ہے، لیکن 9 مئی کا ماسٹر مائنڈ اپنے جھوٹ کے بے نقاب ہونے کے خوف سے فرار کے راستے ڈھونڈ رہا ہے۔