اسلام آباد(ڈیلی پاکستان آن لائن)اسلام آباد ہائی کورٹ نے لاپتہ شہری کی بازیابی کی درخواست میں آئی ایس آئی کو فریق بنانے کا حکم دیتے ہوئے سیکٹر کمانڈر آئی ایس آئی کو آئی جی اسلام آباد کی معاونت کرنے کی ہدایت بھی کی ہے۔

نجی ٹی وی چینل ایکسپریس نیوز کے مطابق ہائی کورٹ میں لاپتہ شہری فیضان عثمان کی بازیابی کے لیے دائر درخواست پر سماعت ہوئی۔ ہائی کورٹ نے مغوی کو جمعرات تک بازیاب کرانےاور درخواست میں آئی ایس آئی کو فریق بنانے کی بھی ہدایت کی جبکہ سیکٹر کمانڈر آئی ایس آئی کو آئی جی اسلام آباد کی معاونت کا بھی حکم دیا۔جسٹس بابر ستار نے آئی جی اسلام آباد کو مغوی کا فون نمبر اور گاڑی ٹریس کرانے کی ہدایت بھی کی۔

عدالت نے مغوی کو بازیاب کرانے کا حکم دیتے ہوئے سماعت جمعرات تک ملتوی کردی۔